Ministri i Brendshëm Sandër Lleshaj ka lëshuar deklarata të forta gjatë prononcimit të tij para mediave pas protestës së opozitës.
Lleshaj tha se organizatorët jo vetëm që nuk kishin marrë masa për mbarëvajtjen e tubimeve, por sipas tij ata nxitën dhunën ndaj institucioneve dhe policisë duke frymëzuar turmat me thirrje për revolucion dhe për dhunë.
Ministri shkoi më tej në deklaratën e tij ku tha se policia bëri detyrën ndaj atyre që kanë vrarë protestues.
“Protesta ishte e dhunshme dhe paligjshme. Ishte një devijim i rëndë nga ligji, pati shumë më pak pjesëmarrës, gjë që përbën një lajm pozitiv se tregon që shqiptarët po kuptojnë se pas kujt nuk duhet të rendin dhe pas kujt duhet të shkojnë.
Por pati shumë më tepër dhunë se më parë dhe kjo tregon dëshpërimin e organizatorëve. Pati më tepër maska, dhe ndaj solli më tepër dhunë. U zhvendos në mënyrë tinëzare nga kryeministria, drejt parlamentit që ishte i boshatisur, duke krijuar pasoja të rënda, duke përfshirë qytetarë të palidhur me protestën, duke sjellë dëme për biznese dhe mjete.
Nga ana e organizatatorëve si çdo herë nuk kishin marrë asnjë masë për të realizuar këtë protestë brenda normave ligjore. Përkundrazi, ishin marrë masa për të përdorur dhunë dhe sulme kundër institucioneve dhe kundër efektivëve. Gjithashtu u lëshuan thirrje të vazhdueshme për revolucion dhe dhunë ndaj institucioneve. U përdorën lëndë djegëse ndaj forcave të policisë. Policia e Shtetit veproi profesionalisht ndaj atyre që kanë vrarë protestues”.
(F.GJ/FAXWEB.AL)
