Ditën që prezantoi “Ndryshojmë” në Këngën Magjike, kantautori i njohur shqiptar Gjergj Leka festoi 55-vjetorin e lindjes.
Në këtë moment të jetës po bën atë që do të bëjë, që ka qejf ta bëjë. Është zhvendosur në periferi në Tiranës, bën një jetë të shëndetshme jashtë zhurmës së kryeqytetit dhe, mbi të gjitha, prej disa vitesh po jeton një dashuri të lumtur. Erisela, partnerja e tij, ndonëse shumë vite më e re nga Gjergji, ia ka gjetur telat. Madje, kantautori rrëfeu nga “Rudina” pasditen e sotme se partnerja e tij është edhe kritikja e tij më e madhe.
Në këngën e tij të fundit, Gjergji, madje shkroi edhe një varg – “kam në krah një engjëll”, që ia dedikoi pikërisht njeriut që i ka rrëmbyer zemrën: “E kam thënë edhe në këngë, ‘unë kam një engjëll’. Ajo ishte e vetmja që më gjeti telat”, – tregon Gjergji.
Pyetjes si e priti partnerja këngën e re të tij, Gjergji tregoi: “Unë ia tregova këngën Eriselës në fund fare. Kur e vura në kompjuter, ajo filloi të qajë dhe më tha ‘je një burrë i mirë’.
Por si është një marrëdhënie e re në moshën 55-vjeçare? Gjergji pranon se bën një jetë shumë më të mirë se ai grup që komenton në rrjetet sociale. Edhe pse një pjesë e mirë e tyre mendojnë ‘doli ky plaku’, atij aq i bën: “Ndihem shumë më mirë se ata që komentojnë. Kur shoh një pjesë prej tyre, më vjen për të qeshur. Edhe pse 24 orë nuk më dalin”, – thotë ai, shkruan ‘’Revista Class”.
Për këtë arsye, as nuk e tremb ideja e plakjes: “Absolutisht nuk më tremb. Nuk dua të jetoj keq, dua të jetoj mirë. Kam më shumë se 10 vjet përpara, që nga mosha 45 e këtej që çdo ditë ngrihem dhe falënderoj Zotin.”
Por a do ta plotësonte edhe më shumë lumturinë një fëmijë në këtë raport? Kësaj pyetjeje, Gjergji i përgjigjet me një ‘jo’ të sinqertë, pavarësisht dëshirës: “Unë mendoj që fëmija duhet rritur me baba. Unë kam vajzën 31 vjeç, por kam edhe parimet e mia në jetë. Nuk dua që kur ta çoj fëmijën në shkollë të thonë erdhi me gjyshin. Kam shumë qejf, por jam pak vonë”, – thotë Gjergji.
Po partnerja, çfarë mendon ajo për këtë vendim që ka marrë Gjergji? A është ajo dakord me të? “Erisela nuk ka si të jetë dakord, por duke qenë se më do shumë, e ka pranuar.
Erisela, madje, i bëri edhe një surprizë në program. Shokun, mikun, bashkëshortin, të zgjedhurin e jetës, ajo e sheh me adhurim. Ashtu si çdo projekt të tijin të ri dhe çdo plan për të ardhmen. Jo më kot Gjergji e ndien veten me fat, me shumë fat madje.
