Seanca e jashtëzakonshme në Kuvend, ç’pritet të ndodhë me vendet e opozitës në Komisionet për Vettingun

U bënë tashmë më shumë se dy javë që jeta parlamentare është pezulluar. Opozita ka bojkotuar Kuvendin dhe të gjitha komisionet parlamentare, nderkohë që vijon të qëndrojë në çadrën përpara kryeministrisë.

Nga ana tjetër maxhoranca duket e vendosur që të mos lëshojë pe përsa i përket kërkesës kryesore të opozitës, qeveri teknike. Koalicioni qeveritar u shpreh i gatshëm për tu ulur në tavolinë me opozitën për të biseduar por jo për të negociuar.

Ndërkombëtarët prej ditësh vijojnë me takime edhe në vendin tonë ku Reforma në Drejtësi dhe ajo Zgjedhore është një domosdoshmëri sipas tyre.

Ndërkohë që sot është parashikuar të  mbahet në Kuvend një seancë e jashtëzakonshme që nis nga ora 18:00. Sot pritet të votohet ngritja e Komisioneve ad-hock që zgjedh anëtarët e institucioneve të vettingut.

Spartak Ngjela thotë për ‘’Ora News’’ se bojkoti i opozitës nuk e bllokon proçesin, duke argumentuar se vendet vakante mund ti plotësojë PDIU, e cila rezulton e regjistruar në koalicion opozitar në KQZ. PD hedh poshte kategorikisht këtë mundësi, ndërsa përfaqësues të mazhorancës në Komisionin e posaçëm parlamentar për reformën në drejtësi, pranojnë se ekzistojnë hapësirat kushtetuese. 

”Vettingu  si normë kushtetuese, s’është i bllokuar, dhe nuk mund të bllokohet për faktin që një pjesë e opozitës nuk do që të marr pjesë në kuvend. Shumë e thjeshtë : praktikisht këtë të drejtë do ta shfrytëzojë plotësisht PDIU, por, edhe ata opozitarë  të tjerë që do jenë në aulën e Parlamentit dhe që nuk jan regjistruar  në KQZ në koalicionin e mazhorancës qeverisëse. PDIU është humbëse në zgjedhjet elektorale të vitit 2013. Domethënë është opozitare, deri atëherë kur ajo nuk është shrregjistruar nga një koalicion  dhe ka bërë marrëveshje parlamentare me mazhorancën aktuale për pozicionin juridik të deputetëve të sajë në Parlamen”, thotë Ngjela. 

Hapësira kushtetuese pranohet dhe nga perfaqësuesit e mazhorancës në Komisionin Parlmentar për reformën në drejtësi, ndërsa konfirmojnë për Ora News, se ende nuk ka një diskutim të tillë.

Por theksojnë vendosmërinë e partnerëve të SHBA dhe BE  për zbatimin e Kushtetutës për vettingun. 

Lu: SHBA dhe unë personalisht ndajmë disa nga synime e protestës aktuale, thirrjen për zgjedhjet e lira dhe të ndershme, dekriminalizimin, veprime më vendimtare kundër narkotikëve. Ajo që nuk ndajmë janë disa nga metodat: bojkoti i parlamentit, çfarëdo kërcënimi për të bllokuar apo bojkotuar zgjedhjet, bllokimi i reformës zgjedhore apo zbatimi i reformës në drejtësi. Sipas mendimit tim, persona seriozë nga e majta dhe e djathta duhet të kryejnë një dialog serioz lidhur me mënyrën për t’i bërë disa gjëra konkrete për të çuar përpara zgjedhje të lira dhe të ndershme, dekriminalizimin dhe luftën kundër narkotikëve. Mendoj se çadra mund të jetë pozitive nëse shohim përparim me synimet. Çadra mund të jetë negative nëse shohim vetëm metodat, pra bojkotimi i parlamentit apo prishja e zgjedhjeve.

Por burimet pranë Partisë Demokratike hodhën poshtë mundësinë që vendet vakante në Komisionin ad-hock,  mund të plotësohen nga Partia për Drejtësi Integrim dhe Unitet,  duke theksuar se ajo është pjesë e mazhorancës dhe përfaqësohet në kabinetin qeveritar.