Zyrtar i lartë i PDK-së, Xhavit Haliti ka deklaruar se seanca e radhës së Kuvendit të Kosovës do të mbahet në fillim të shtatorit, me ç’rast do të konstituohet Kuvendi dhe do të votohet Qeveria e re.
Po kështu edhe përfaqësuesit e koalicionit PDK-AAK-Nisma (PAN) kanë bërë të ditur se në javën e parë të këtij muaji mund të votohet edhe Qeveria e re.
Theksojmë që Kadri Veseli, i nominuari i PAN-it për kryeparlamentar, nuk gëzon përkrahjen e dy blloqeve, “Vetëvendosjes” e LAA-së. Por zytarë të PAN-it kanë thënë se Veseli do të vazhdojë të jetë i nominuari i vetëm për pozitën e kryekuvendarit nga ky koalicion.
Sipas Gazeta “Zëri” përfaqësuesit e LVV-së e të LAA-së vazhdojnë të zotohen se nuk do ta votojnë në asnjë mënyrë Veselin. (J.V/Shuplaka)
