Në Shqipërinë e sotme, sidomos në zonat urbane, është vënë re një rritje shqetësuese e aksidenteve rrugore. Një pjesë e madhe e këtyre incidenteve përfshijnë përdorues të mjeteve alternative si motorët, biçikletat dhe monopatinat. Në këtë situatë alarmante, ngrihet një pyetje thelbësore: A janë drejtuesit më të pakujdesshëm, apo infrastruktura nuk po përballon flukset e reja të trafikut?
Për të analizuar këtë problematikë, gazetarja e Fax News, Fatime Baçi, bisedoi me ekspertin e sigurisë rrugore, Arben Luzi. Sipas Luzit, situata nuk mund të analizohet vetëm nga një këndvështrim, pasi shkaktarët janë të ndërlidhur: mungesa e disiplinës së drejtuesve dhe infrastruktura e papërshtatshme ecin krah njëra-tjetrës.
“Nëse shohim përdorimin e monopatinave, vihet re që shumë fëmijë lëvizin nga dy veta mbi një monopatinë, çka përbën një rrezik serioz për sigurinë në rrugë. Kjo vihet qartë re edhe nga këndvështrimi i përdoruesve të tjerë të trafikut,” thekson Luzi.
Ai shton se biçikletat dhe motocikletat duhet të qarkullojnë vetëm në hapësirat e përcaktuara për to. Në mungesë të infrastrukturës së dedikuar, përdoruesit shpesh i përdorin trotuaret apo zona të papërshtatshme, gjë që rrit ndjeshëm rrezikun e aksidenteve. “Shumica e biçiklistëve nuk respektojnë rregullat, duke qarkulluar në mënyrë të parregullt dhe duke krijuar burime të shtuara aksidentesh, sidomos gjatë kthimeve ose ndryshimeve të drejtimit të lëvizjes,” shton ai.
Një tjetër pikë e rëndësishme që ngre eksperti është roli i policisë rrugore. Sipas Luzit, policia duhet të fokusohet në menaxhimin e trafikut dhe në rritjen e sigurisë rrugore, jo në kontrolle rutinë të dokumenteve, të cilat shpesh kthehen në burim tensioni dhe vonesash për qytetarët.
“Pozicioni i policisë rrugore ka si funksion kryesor ndihmën në menaxhimin dhe rregullimin e qarkullimit rrugor. Keqinterpretimi i këtij roli, duke e kthyer policinë në një organ që merret kryesisht me kontrolle dokumentesh, dëmton imazhin e institucionit,” përfundon Arben Luzi.
Në përfundim, për të përmirësuar sigurinë rrugore në Shqipëri, kërkohet një ndërhyrje e integruar: edukimi dhe ndëshkimi për shkelësit, zhvillimi i infrastrukturës së dedikuar për mjetet alternative dhe një polici rrugore që të fokusohet më shumë në siguri sesa në burokraci.
