Sekretari i Shtetit i SHBA-së, Marco Rubio, u takua të premten në Malajzi me Ministrin e Jashtëm kinez , Wang Yi, në bisedimet e para ballë për ballë të të dyve që kur Presidenti i SHBA-së, Donald Trump, u rikthye në Shtëpinë e Bardhë.
As diplomatët dhe as delegacionet e tyre nuk folën me gazetarët ndërsa pozuan për foto në krye të takimit, por Rubio i quajti bisedimet “pozitive” pasi ato mbaruan.
Rubio dhe Wang ndodhen në Kuala Lumpur për një takim të ministrave të jashtëm nga Shoqata e Kombeve të Azisë Juglindore, ose ASEAN. Takimi midis të dyve shënon një nga angazhimet e nivelit më të lartë midis SHBA-së dhe Kinës që kur Presidenti Donald Trump u rikthye në detyrë në janar.
Të enjten, Wang tha se të dy vendet po përballeshin me sfida “të tilla si ndikimi i proteksionizmit të njëanshëm dhe abuzimi me tarifat nga një vend i caktuar i madh” dhe bëri thirrje për një rend ndërkombëtar “më të drejtë dhe më të arsyeshëm”.
Presidenti i SHBA-së, Donald Trump, ka kërcënuar disa vende aziatike me tarifa të larta nëse nuk arrijnë një marrëveshje me të deri më 1 gusht. Pasi mori detyrën në janar, Trump vendosi tarifa deri në 145% për mallrat kineze.
Të dyja palët e përshkallëzuan luftën tregtare duke vendosur tarifa të larta ndaj njëra-tjetrës, por në maj ranë dakord të ulnin tensionet në atë që Trump e quajti një “rivendosje totale”.
Dy superfuqitë pritej gjithashtu të diskutonin ishullin e vetëqeverisur të Tajvanit, të cilin Kina e pretendon si të vetin . Shtetet e Bashkuara mbështesin të drejtën e Tajvanit për vetëqeverisje dhe mbeten furnizuesi i saj më i madh i armëve. Përpara takimit, Rubio tha se ka të ngjarë të ngrejë me Wang shqetësimet e SHBA-së lidhur me mbështetjen e Kinës për Rusinë në luftën e saj kundër Ukrainës.
“Kinezët qartësisht i kanë mbështetur përpjekjet ruse dhe mendoj se në përgjithësi ata kanë qenë të gatshëm t’i ndihmojnë ata sa më shumë që mundën pa u kapur”, tha ai.
