Sekretari amerikan i Shtetit Rex Thillerson, ka telefonuar sot kryeministrin Edi Rama. Mësohet se Thillerson e ka uruar kryeministrin shqiptar për fitoren e zgjedhjeve të 25 qershorit, ndërsa shprehet se kjo fitore detyron Partinë Socialiste të shpejtojë reformat e nisura, për pastrimin e administratës nga të korruptuarit si edhe në luftën ndaj krimit.
Sekretari i Shtetit i ka përcjellë Edi Ramës përshtypjet shumë pozitive të Zëvendës Presidentit Pence nga takimi i javës së shkuar në Malin e Zi dhe ka rikonfirmuar vullnetin amerikan për një vëmendje të përqendruar në zhvillimet në rajon, thuhet në njoftimin e Kryeministrisë.
Nga ana tjetër, Rama e ka falënderuar Thillerson për telefonatën dhe i ka bërë një pasqyrë të plotë të situatës rajonale nga këndvështrimi i vendit tonë, duke u përqendruar kryesisht tek dialogu Kosovë – Serbi dhe nevoja për zhbllokimin e ngërçit të emrit të Maqedonisë.
Ndër të tjera, Rama dhe Thillerson kanë biseduar lidhur me rolin e Shqipërisë në NATO, në luftën kundër ekstremizmit, për të cilat sekretari amerikan është shprehur mjaft pozitiv. (D.D/Shuplaka)
Discussion about this post