Sekretari amerikan i Shtetit, John Kerry deklaron se regjimi sirian është fajtor për krime kundër njerëzimit dhe për krime lufte, prandaj duhet të ndalohet.
“Bombardimet e verbëra të regjimit në Alepo shkelin të drejtën ndërkombëtare dhe përbëjnë në shumë raste krime kundër njerëzimit dhe duhet të marrin fund menjëherë”, ka thënë Kerry.
Sipas Kerry-t konflikti në Siri, e sidomos beteja e qeverisë së Bashar al Assad për të rimarrë Aleppo-n, “është katastrofa më e rëndë që prej Luftës së Dytë Botërore”.
Këto deklarata Kerry i ka bërë nga Parisi, pasi përfundoi takimin me përfaqësues të 10 vendeve perëndimore dhe arabe, që kundërshtojnë regjimin e Damaskut.
Sekretari i shtetit amerikan theksoi se është e nevojshme që palët e përfshira në këtë konflikt të rikthehen në tryezë për bisedime, për të shmangur shkatërrimin e plotë të Aleppo –s.
