Policia e Kavajës ka vijuar kontrollet intensive përgjatë vijës bregdetare, në kuadër të operacionit policor të koduar “Plazhi i lirë”, me synimin për të liruar hapësirat publike të zëna në mënyrë të paligjshme gjatë sezonit veror.
Gjatë kontrolleve të zhvilluara në plazhin e Golemit, shërbimet e Komisariatit të Policisë Kavajë konstatuan dhe sekuestruan 70 komplete me çadra dhe shezlongë, të cilat ishin vendosur pa leje nga qytetarë apo pushues, duke bllokuar hapësira publike.
Policia thekson se kontrollet do të vijojnë përgjatë gjithë vijës bregdetare, jo vetëm për lirimin e hapësirave publike, por edhe për verifikimin e ligjshmërisë së aktiviteteve të subjekteve që ushtrojnë veprimtari në zonat turistike gjatë sezonit veror.
Qëllimi i këtij operacioni është të garantohet një akses i barabartë për të gjithë pushuesit, si dhe të ndalohet çdo veprim i paligjshëm që cenon pronën publike në zonat e plazhit.
