Kundërshtari i drejtpërdrejtë i Lulzim Bashës për zgjedhjet në PD Eduart Selami shkruan në rrejte sociale se edhe pas humbjes së vitit 2013 demokratët nuk e morën mesazhin e popullit dhe se duhet hequr modeli se “kush kundërshton kryetarin hiqet”
“Në 2013-n ne dolëm në opozitë dhe nuk e morëm mesazhin e popullit. Kur ne të vendosim meritokraci dhe konkurrencë do të mund të ndryshojmë dhe të sjellim një frymë të re. Basha e kishte këtë rast dhe nuk e përdori, prandaj jemi këtu. Duhet ta vendosë baza listën, jo kryetari. PD ndjek një model që duhet të eleminohet: ‘kush kundërshton kryetarin, hiqet’. Kjo duhet të ndryshojë. Ka një anomali të madhe në këtë sistem që quhet parlamentar. Ky është një sistem partiak, sepse anëtarët e tij janë deputetë liste që nuk përfaqësojnë popullin. Unë në PD do të krijoj grupin e punës, këshillin kombëtar, do të vë në punë ato departamente që nuk funksionojnë dhe do të bëjmë një opozitë konstruktive për qytetarin, që nuk është bërë”, shkruan Selami.
Ndërkohë në një tjetër postim para dy orësh Selami shkruante se duhet një analizë brenda familjes së demokratëve që është PD.
“Eshtë për të ardhur keq që forcën e parë politike ku unë kam patur kënaqësinë të jem ndër themeluesit e saj, koha e ka lënë pas. Dhe këto zgjedhje treguan pikërisht këtë. Prandaj PD-ja dhe demokratët duhet të ecin me hapin e kohës dhe duhet t’i paraprijnë. Unë jam shumë i sigurt që kjo do të vijë, dhe ky do të jetë dhe kontributi im në këto zgjedhje për kryetar të PD-së..
Unë mendoj se këto janë periudha sa të vështira po aq të mbarsura me mundësi, për një reformim dhe rinovim të vonuar të PD-së, për ta ngritur atë aty ku janë vlerat më të mira të demokracisë dhe të partive politike bashkëkohore. Ajo çka është më kryesorja është një analizë e drejtpërdrejtë, e sinqertë, e hapur, brenda familjes politike, duke parë në radhë të parë gjërat që në bashkojnë se sa ato që na ndajnë”, shkruante Selami.
(M.D/Shuplaka)
Discussion about this post