Vrasja e politikanit serb Oliver Ivanoviçit, ka bërë që të ketë shumë tensione ndërmjet Kosovës dhe Serbisë.
Së fundmi ministri i Mbrojtjes të Serbisë, Aleksandar Vulin, ka dhënë një mesazh të qartë se ushtria e Serbisë është e gatshme të reagojë ndaj çfarëdo kërcënimi për qytetarëve serbë kudo që jetojnë.
“Ushtria e Serbisë është e gatshme të mbrojë çdo pjesë të territorit tonë dhe jemi mjaft të organizuar dhe të përgatitur për të gjithë qytetarët e Serbisë dhe i sigurojmë se paqja dhe stabiliteti i vendit tonë nuk mund të rrezikohet, nëse ushtria serbe është këtu”, ka thënë Vulin.
Për këtë deklaratë të Vulin ka reaguar edhe KFOR. Zëdhënësi i KFOR-it, Vincenzo Grasso, në një përgjigje për portalin Arbresh.info lidhur me deklaratën e Aleksandar Vulinit ka thënë se KFOR-i vazhdon të garantojë një mjedis të sigurt dhe të lirë për të gjithë qytetarët e Kosovës.
“KFOR-i vazhdon të garantojë një mjedis të sigurt dhe të garantojë një liri të lëvizjes nëpër Kosovë, nën dispozitat e rezolutës së OKB-së 1244 për të gjithë qytetarët e të gjitha etniteteve. KFOR mbetet vigjilent, dhe duke punuar në bashkëpunim të ngushtë me organizatat vendëse dhe ndërkombëtare të sigurisë”, reagon KFOR. (J.V/Faxweb)
Discussion about this post