Shqipëri-Serbi do të jetë sfida e shumëpritur për shqiptarët anembanë globit, një përballje jo sit ë tjerat që sigurisht nuk zgjat vetëm 90 minuta. Një histori e gjatë marrëdhëniesh jo të mira mes dy popujve, të cilat prekën edhe futbollin, në Tetorin famëkeq të 2014. Gjithsesi përtej dozes emocionale që natyrshëm kjo sfidë mbart, është momenti të ndalemi sigurisht edhe tek ata të cilët do të zbresin në fushë, e që do të jenë aktorët kryesorë të “betejës” sportive që do të mbërthejë kryeqytetin mbrëmjen e 7 Qershorit në “Arenën Kombëtare”.
Nëse flasim për cilësi në fushë, të dyja skuadrat kanë përparuar në këtë drejtim, mjafton të shohim klubet se ku ata luajnë. E përditshmja sportive “Panorama Sport” ditën e sotme ka nënvizuar një fakt shumë interesant, teksa thekson se klubet e Serie A mbizotërojnë në radhët e të dyja skuadrave. Një tregues ky i faktit se sa shumë mirë njihen me njëri tjetrin këta futbollistë, duke qenë se i shohim të përballen çdo fundjavë në Serie A.
Alen Sherri, Hysaj, Ismajli, Gjimshiti, Ramadani, Asllani, Berisha janë futbollistët kuqezi që aktivizohen në kampionatin Italian, por jo më mbrapa mbesin serbët, me teknikun Dragan Stojkoviç që ka në gjirin e skuadrës së tij plotë 4 futbollistë që luajnë në Apenine: Pavloviç dhe Joviç tek Milan, Lazar Samardzig tek Atalanta si dhe Dusan Vlahoviç i Juventusit.
