Hetimet ndaj drejtuesve të lartë të Inspektoratit të Lartë të Deklarimit dhe Kontrollit të Pasurive dhe Konfliktit të Interesit për shpërdorim detyre, janë bllokuar. Fillimisht u raportua se Prokurorisë i është hequr e drejta për të marrë të dhënat e serverit i ILDKPKI-së, kjo me arsyetimin se bllokohet puna e insitucionit.
Megjithatë, sipas “Tv Klan”, Prokuroria nuk ka kërkuar në asnjë moment bllokimin e serverit në fjalë, por vetëm kopjimin e të dhënave. Gazetarët e televizionit raportojnë se kanë siguruar vendimin e sekuestrimit të prokurorisë se kryeqytetit për disa materiale nga inspektorati. Në këtë dokument, janë të listuara të gjitha dokumentet që kërkohen për llogari të këtij hetimi.
Edhe pse ekziston dokumenti që vërteton se Prokuroria kërkon vetëm kopjimin e serverit, të tre shkallët e gjyqësorit kanë rënë dakort në një vendim: “Prokurorit t’i hiqet e drejta për t’i patur këto të dhëna”.
Të dhënat që kërkoheshin nga organi i akuzës ishin nga krijimi i institucionit, e deri në datën 8 nëntor 2016. Gjyqtarët që shqyrtuan në dhomë këshillimi rekurset e Prokurorisë së Përgjithshme, e cila ka humbur më herët edhe në dy shkallët e tjera të gjyqësorit janë Guxim Zenelaj, Artan Zeneli dhe Tom Ndreca.
Një nga përplasjet midis ambasadorit Donald Lu dhe kryeprokurorit Adriatik Lalla, kishte të bënte pikërisht me sekuestrimin e këtyre dokumenteve. (D.D/Shuplaka)
Discussion about this post