“Sfida për Shqipërinë ka sot njëvjetorin e themelimit. Në këtë njëvjetor, Gjergj Bojaxhi thotë se kjo lëvizje është për njerëzit që ndihen të pakënaqur nga kjo politikë.
“Sfida për Shqipërinë është një lëvizje e shumicës së shqiptarëve që ndihen të papërfaqësuar nga këta politikanë, që ndihen të zhgënjyer nga kjo politikë, që ndihen të ngopur nga premtimet boshe dhe që duhet të ngrihen për një të ardhme më të mirë. Do të ngrihen ata që ndihen të zhgënjyer nga kjo politikë; do të ngrihen ata që ndihen të gënjyer nga premtimet njëlloj të këtyre politikanëve; por mbi të gjitha, do të ngrihen ata që duan të shohin shpresë për një të ardhme për këtë vend.”, tha Bojaxhi.
Më tej, Bojaxhi tha se ajo që e mban peng këtë vend nuk është mungesa e potencialit, apo e aftësive të shqiptarëve, por politika.
“Ajo që e mban peng këtë vend është vetëm mungesa e dëshirës së këtyre politikanëve që ky vend të bëhet. Por ne vendosëm të mos presim më. Pas garës së Tiranës, vendosëm të bashkoheshim, edhe më shumë, për një Sfidë që lind në kryeqytet, por që është e gjithë Shqipërisë,” u shpreh Bojaxhi. (D.D/Shuplaka)
