Aktori i mirënjohur i humorit, Agron Llakaj, ka ironizuar së fundmi partitë politike në vend dhe ka sfiduar sondazhet duke treguar “exit pollin” e tij. Në një intervistë të dhënë për gazetën “Tema”, gazetarin Andrea Danglli, ai ironizon tri partitë politike që sipas tij “janë bashkë në qeveri dhe janë të tria kundër njëra-tjetrës.
Duke sfiduar sondazhet e deritanishme, aktori Agron Llakaj deklaroi “exit pollin” e tij. Sipas Llakajt, PS merr 71 mandate, PD 60 mandate dhe LSI 58.
Duke u ndalur tek kryeministri dhe njëherazi kreu i PS-së, Edi Rama, Llakaj shprehet se pas katër vitesh Rama pritet të thotë se e mori timonin por e mbante bashkë me shokët, të cilët ishin ata që nuk dinin ta mbanin. E kështu do të kërkojë sërish t’ia japim timonin dhe ne do ia japim.
Pjesë nga intervista e Agron Llakajt:
Përmes artit tuaj z.Llakaj, në një farë mënyre keni zgjedhur të jeni “armik” me të gjitha forcat partiake duke mos mbajtur asnjë kah politik. Pse erdhi kjo zgjedhje?
Përkundrazi, unë i dua të gjitha partitë dhe sidomos PS-në, PD-në dhe LSI-në. Mund të them me siguri se nuk ka në botë si këto tre forca politike. Janë bashkë në qeveri dhe janë të tria kundër njëra-tjetrës. Dinë më së miri të ndajnë pjesën që u takon dhe këtë e dëshmon edhe kjo fushatë.
Më pëlqen shumë Edi Rama, i veçantë dhe unik, me tumane dhe bluza apo këmisha të qëndisura me 2. Shoë-man, tregon barcaleta, qesh dhe vetë bashkë me to pasi i duket sikur ato që thotë nuk mund t’i bëjë dot askush më mirë se ai. Rama kërkon që timonin ta ketë vetë sepse në katër vjet ja kafshuan tepsinë të tjerët, kurse ky kafshonte veten me dhëmbë. S’ka rëndësi se ku e kafshonte. Unë them që t’ia japim këtë mundësi dhe pas katër vjetësh të tjera ky pritet të thotë se unë timonin e mora por e mbaja bashke me shokët por ishin ata që nuk dinin ta mbanin timonin. Kështu që aman ma jepni edhe njëherë? Dhe ne përsëri do t’ia japim!
Më duket se i parashikuat zgjedhjet për 8 vjet përmes kësaj formule…
Po, madje kam edhe një exit pollin tim për datën 25 Qershor. Ja se si e kanë parashikuar të anketuarit e mi:
PS: 71 deputetë.
PD: 60 deputetë.
LSI: 58 deputetë.
Parti të tjera: 30 deputetë.
Pjesëmarrja në zgjedhje: 25%.
Kryeministër teknik: 60% e te anketuarve te mi.
Kryeministër mekanik: 47%
Kryeministër të çmendur: 100%.
(XH.A/SHUPLAKA)
