Emigrantët në Greqi që nuk kanë përfituar ende një leje qëndrimi, mundet që të shfrytëzojnë shansin që u jepet për legalizimin e tyre. Në rast se arrijnë të përmbushin disa kushte të caktuara, do të arrijnë të kenë lejen e qëndrimit për arsye të jashtëzakonshme.
Mund të përfitojnë leje qëndrimi ata emigrantë që dikur e kanë pasur atë, pavarësisht se mund t’u ketë skaduar. Përfitojnë edhe ata që kanë në pasaportën e tyre një vizë hyrëse në Greqi, të lëshuar tre vjet para aplikimit.
Shumë emigrantë që ndodhen në Greqi prej vitesh, nuk arritën asnjëherë të marrin leje qëndrimi. Por së fundmi, ata mundet të aplikojnë nëse vërtetojnë se ndodhen në Greqi të paktën shtatë vitet e fundit.
Krahasuar me rreth dy vite më parë kur aplikimet pranoheshin në një zyrë të vetme duke bërë që aty të grumbulloheshin më shumë se 100.000 aplikime, tanimë qeveria greke ka vendosur aplikimet të bëhen në gjithë Greqinë, dhe në zyrat përkatëse të shërbimit të emigrantëve.
Sipas drejtorit të drejtorisë së emigracionit në periferinë e Athinës, Ilias Hronopulos, shprehur për “Ora Neës” kjo krijon edhe probleme:
“E vetmja gjë pozitive është se tashmë nuk do të jetë nevoja që të gjithë të grumbullohen në një pikë, në Pire, por aplikimet do t’i bëjnë aty ku banojnë. Sigurisht, fakti që ky proces fillon njëkohësisht me lejet biometrike dhe sistemin e ri kompjuterik, neve që përballojmë një fluks shumë të madh emigrantësh, do të na vështirësojë sepse, e kuptoni që për ne prioritet kanë emigrantët me dokumente, unë nuk do t’i mbyll të gjitha takimet për ata që nuk kanë letra dhe të lej të presin ata që janë me leje të skaduara duke i bërë të paligjshëm. Nuk është logjike kjo!
Gjithsesi, në momentin që bën aplikimin, emigranti fiton një farë statusi që të paktën i garanton qëndrimin në Greqi, deri në momentin e përgjigjes përfundimtare. Kjo është një tjetër anë pozitive, shpjegon Fatos Malaj, ndërmjetës ndërkulturor në qendrën e shërbimit të emigrantëve, Athinë.”
(XH.A/SHUPLAKA)
Discussion about this post