Sekretari amerikan i Mbrojtjes, James Mattis pasditen e të hënës ka konfirmuar se mbi 3 mijë trupa të tjerë amerikanë do të nisen drejt Afganistanit, si pjesë e strategjisë së re të Donald Trump, për të fituar luftën që vijon prej 16 vitesh.
“Janë diçka më shumë se 3 mijë trupa dhe ndërkohë që flasim nuk e kam firmosur ende urdhrin e fundit që të flasim me specifika, pasi po punojmë për elementët e fundit”, tha Mattis .
Me herët, Senaori David Perdue përmendi “më shumë se 3500 trupa” në një artikull të publikuar nga Defense One.
“Për një kohë të gjatë, strategjia e Amerikës në Afganistan u udhëhoq nga politika, duke çuar në kufizim arbitrar të trupave dhe tërheqje në një kohë të pa arsyeshme të tyre”, shkruante Perdue.
Ndërkohë Trump e njoftoi strategjinë e tij të re në fund të Gushtit, duke u zotuar për reagim të “shpejtë dhe të fuqishëm” kundër organizatave terroriste që kërkojnë të fshihen në Afganistan.
(S.SH/Shuplaka)
