Imazhet e reja satelitore tregojnë aktivitetin e restaurimit në kompleksin bërthamor të bombarduar Fordow të Iranit, disa ditë pas sulmeve ajrore masive amerikane dhe izraelite që synonin dëmtimin e programit bërthamor të Teheranit. Sipas kompanisë amerikane të imazheve satelitore Maxar Technologies, imazhet, të marra nga Business Insider, tregojnë ekskavatorë dhe buldozerë të rëndë që lëvizin dheun pranë kratereve dhe vrimave në rajonin malor verior të Fordow.
Zona u godit nga bombat depërtuese amerikane GBU-57, të cilat Pentagoni tha se kishin në shënjestër kanalet e ventilimit thellë në kompleksin nëntokësor. Imazhe të tjera tregojnë makineri që hapin rrugë të reja hyrëse dhe riparojnë rrugën kryesore që të çon në qendrën nëntokësore të pasurimit. Sipas ekspertëve nga Instituti Mbretëror i Shërbimeve të Bashkuara (RUSI), iranianët mund të jenë duke u përpjekur të rivendosin aksesin në mënyrë që të vlerësojnë shkallën e dëmit dhe gjendjen e pajisjeve, megjithëse kjo nuk është konfirmuar zyrtarisht.
Gjenerali Dan Kaine, kryetar i Shtabit të Përbashkët të SHBA-së, tha në një konferencë për shtyp në Pentagon se gjatë “Operacionit “Heakri i Mesnatës” bombat “shkatërruese të bunkerëve” ranë njëra pas tjetrës në kanalet e ventilimit, rezultat i një studimi pesëmbëdhjetëvjeçar nga Agjencia Amerikane e Reduktimit të Kërcënimit Bërthamor (DTRA) mbi mënyrën se si ato mund të shkatërronin kompleksin nëntokësor.
Donald Trump u mburr se bastisjet amerikane shkaktuan “shkatërrim total” të infrastrukturës bërthamore të Iranit dhe vlerësoi se Teherani nuk do të ishte në gjendje ta rindërtonte atë. Megjithatë, ekspertët e armëve bërthamore vënë në dyshim nëse programi është neutralizuar përgjithmonë. Siç vërejnë ata, është e vështirë të “bombardohet njohuria” dhe Teherani tani mund të ketë një nxitje edhe më të madhe për të ecur përpara me zhvillimin e armëve bërthamore.
Bombardimet fundjavën e kaluar goditën gjithsej tre vende kryesore: Fordow dhe Natanz me bomba me depërtim të thellë dhe Isfahan me raketa Tomahawk të lëshuara nga deti. Shkalla e plotë e dëmit në rezervat dhe pajisjet e uraniumit të pasuruar është ende duke u vlerësuar.
