Eksperti i sigurisë, Bedri Elezi, ishte i ftuar në Fax News ku komentoi zhvillimet më të fundit në fushën e sigurisë dhe veçanërisht pjesëmarrjen e Kosovës në stërvitjen ndërkombëtare “Defender 2025”. Elezi e cilësoi këtë një hap të madh përpara, duke e quajtur një lajm jashtëzakonisht pozitiv jo vetëm për Forcat e Sigurisë së Kosovës, por për gjithë vendin.
Sipas tij, Policia dhe Forcat e Sigurisë së Kosovës janë të mirëorganizuara dhe po tregojnë profesionalizëm të lartë, çka dëshmon se Kosova është në rrugën e duhur për të forcuar pozicionin e saj në arenën ndërkombëtare.
“Kam bindjen e plotë se Kosova do të marrë vlerësime dhe çmime për kontributin e saj në siguri. Ajo tashmë nuk është më një spektatore, por pjesëmarrëse aktive në zhvillimet ndërkombëtare të sigurisë,” – tha Elezi.
Ai theksoi se mbështetja e Shteteve të Bashkuara të Amerikës është thelbësore në këtë rrugëtim dhe se SHBA mbetet garancia më e madhe për anëtarësimin e Kosovës në NATO. Sipas tij, kjo është një çështje kohe dhe vendosmërie.
