SHBA godet atentatorët e tragjedive të Parisit dhe Brukselit

Mediat botërore raportojnë se janë vrarë dy nga atentatorët e përfshirë në sulmet e nëntorit të vitit 2015 në Paris të Francës.

Atentatorët janë vrarë nëpërmjet një sulmi ajror të ndërmarrë nga Shtetet e Bashkuara në Siri.

Salah Gourmat dhe Sammy Djedou ishin dy atentatorët të cilët Pentagoni i ka cilësuar si pjesëtarë të të ashtuquajturit Shtet Islamik.

Në këtë sulm ka mbetur edhe një tjetër i vdekur, sërish pjesë e grupit xhihadist, i cili mendohet të ketë patur lidhje me komplotet terroriste në Belgjikë gjatë 2015-ës.

Në momentin e sulmit nga SHBA, të 3 terroristët ishin duke thurur plane për sulme të tjera me objektiv Perëndimin, njofton Pentagoni.

Treshja terroriste ka qenë pjesë e një rrjeti të udhëhequr nga Boubaker Al-Hakim, i cili është vrarë në një tjetër sulm ajror të koalicionit të udhëhequr nga Amerika, më 16 nëntor.