Tre zyrtarë amerikanë paralajmëruan sot se Rusia dhe presidenti i saj Putin mund të përballen me sanksione për shkak të ndërhyrjes së pretenduar, në zgjedhjet presidenciale të muajit të kaluar.
“Zëri i Amerikës” raporton se SHBA ka vendosur që në këto sanksione të përfshihet dëbimi i 35 diplomatëve rusë, të cilët do të kenë 72 orë afat për t’u larguar. Do të mbyllen gjithashtu edhe dy komplekse në Nju Jork dhe Merilend, që përdoren nga zyrtarët rusë për qëllime zbulimi, në përgjigje të një fushate ngacmimesh ndaj diplomatëve amerikanë në Moskë.
VOA shkruan se vendimi i Obamës parashikon gjithashtu sanksione ndaj dy agjencive kryesore ruse të zbulimit si dhe ndaj katër drejtuesve të Shërbimit Ushtarak të Zbulimit, për të cilët Shtëpia e Bardhë beson se kreu sulmet kibernetike ndaj Komitetit Kombëtar Demokrat dhe organizatave të tjera politike.
Por pas këtij lajmërimi, ka reaguar ashpër Ministria e jashtme ruse e cila i konsideron akuzat si gënjeshtra.
“Të jem e sinqertë, jemi lodhur nga gënjeshtrat për ‘hakerat rusë’ që vazhdojnë të burojnë nga rangjet më të larta të qeverisë amerikane,” tha zëdhënësja e ministrisë Maria Zakharova.
Sanksionet e reja mund të zbatohen me sukses, por nuk dihet nëse presidenti i ardhshëm Trump, do t’i qëndrojë besnik atyre pasi të marrë zyrtarisht detyrën. (D.D/Shuplaka)
