Ambasada e SHBA-ve në Shkup ka paralajmëruar qytetarët e saj në Maqedoni për të shmangur tubimet masive të 11 dhjetorit, ditës së zgjedhjeve, pasi sipas tyre mund të ketë trazira.
Edhe pse ambasada njofton se kjo është një lajmërim i zakonshëm për të gjitha vendet që zhvillojnë zgjedhje tensionet e këtyre ditëve në vendin fqinj lënë mundësinë e parashikimeve jo të mira.
“Maqedonia do të mbajë zgjedhjet parlamentare të dielën, më 11 dhjetor. Ndërsa zgjedhjet e fundit në Maqedoni ishin të qeta, janë të mundshme trazira që lidhen me zgjedhjet. Ambasada e SHBA u bën thirrje të gjithë qytetarëve amerikanë të jenë të vetëdijshëm për ngjarjet në lidhje me zgjedhjet e 11 dhjetorit dhe për të shmangur turmat e mëdha, protesta dhe tubime të mundshme. Qytetarët amerikanë duhet të ndjekin këshillat e zyrtarëve lokalë të cilët janë përgjegjës për sigurinë e të gjithë vizitorëve në Maqedoni “, njoftoi ambasada e SHBA-së në Maqedoni.
