Pas deklaratave të Kryeministrit Rama në mitingun e Kongresit të PS-së për ndërtimin e një Tirane të re më moderne dhe atraktive për syrin e të huajve, pas shembjes së ndërtesave të vjetra të cilat konsiderohen monumente kulture si: Teatrin e Kukullave, Muzeun Kombëtar apo Teatrin Kombëtar ka patur disa reagime të forta nga aktivistët në lidhje me këtë çështje.
Në një intervistë për Fax News me gazetaren Mirilda Tili, aktivisti Andi Tepelena ka folur për rëndësinë dhe vlerat kulturore që përbëjnë këto monumente për vendin tonë.
Sipas aktivistit Tepelena, shkatërrimi i këtyre monumenteve është shumë e gabuar për shkak se ato ruajnë vlera të rëndësishme kulturore dhe krijojnë identitetin tonë kombëtar, sikurse ai shprehet. Aktivisti i pyetur në lidhje me mesazhin e Kryeministrit Rama pak ditë më parë në mitingun e Kongresit të PS është shprehur se kryeministri ka dhënë një mesazh të shëmtuar dhe se ka qëllime klienteliste në vendimet e tij. Ndër të tjera ai thotë se: “Mesazhi i Ramës është një mesazh i shëmtuar dhe antiligjor, ai që dha në miting ditën e Kongresit. I referohem fjalës që tha teatri kombëtar edhe ai i kukullave janë një karakatinë.
Në konceptin e ruajtjes së vlerës kulturore nuk mund të hidhen sepse janë identiteti kulturor. Nuk mund ti hedhim sipas dëshires së kryeministrit të radhës. Vendimi për të shembjen e tyre tregon se ka qëllime klienteliste në këtë mes.
Vendimarrja në fund të fundit u takon shqiptarëve, nuk mund të marrë vendim qeveria për monumente të tilla që ju takojnë shqiptarve.”
Në lidhje me faktin se nëse ka të drejtë Kryeministri apo qeveria për të prishur këto objekte sipas ligjit, Tepelena shprehet se një gjë e tillë mund të ndodh vetëm nëse atyre u hiqet statusi i Ministria e Kulturës apo Këshilli i Restaurimit. Ndërkohë ai po ashtu e akuzon qeverinë se qëllimisht i ka lënë këto objekte të degradojnë duke mos i mirëmbajtur ato. Për më tepër Aktivisti Tepelena shprehet se: “Këto objekte përderisa kanë statusin e monumentit të kulturës, këtë status mund ta heq nga lista Ministria e Kulturës apo Këshilli i Restaurimit, por për monumente të tilla do të ishte e pakonsiderueshme….
Në fakt degradimi dhe amortizimi i këtyre objekteve kryesisht Teatri Kombëtar po bëhet me qëllim, duke mos investuar në të dhe duke mos e mirëmbajtur atë, por edhe objektet e tjera.”
Discussion about this post