Një tjetër person ka humbur jetën si pasojë e të ftohtit. Viktima e uljes së temperaturave është identifikuar si Leonard Beqiri.
Mësohet se shtetasi L. Beqiri 54 vjeç, ka ndërruar jetë në spital. Sipas burimeve të spitalit të Sarandës, shkak i vdekjes së tij është bërë i ftohti dhe kequshqyerja.
Leonard Beqiri u gjet nga Policia e Sarandës teksa mbijetonte në kushte të mjerueshme në një automjet të braktisur dhe pa familje. Pavarësisht trajtimit mjekësor prej disa ditësh, ai nuk ka mundur të mbijetojë.
Kujtojmë se ky shtetas është viktima e dytë prej të ftohtit në vend pas një tjetër endacaku që u gjend i pajetë në rrugët e Durrësit.
Detaje nga Policia e Sarandës:
Rreth orës 11:45, në Spitalin e Sarandës ka ndërruar jetë një shtetas. Shtetasi me gjeneralitetet L.B., rreth 53 vjeç, banues në lagjen nr.1 Sarandë, ishte dërguar në Spital nga Patrulla e Policisë më datë 07.01.2017. Nga hetimet paraprake të Policisë, ka rezultuar se ky shtetas ishte përdorues i pijeve alkoolike. Gjithashtu, sipas mjekëve, vdekja ka ardhur për shkak të konsumimit të tepërt të alkoolit. Po punohet për sqarimin e rrethanave të ngjarjes.
(XH.A/SHUPLAKA)
