Shërbimi Sekret Gjerman hetoi kanabisin në Shqipëri, Edi Rama në dijeni

Shërbimi Sekret Gjerman ka hetuar kanabisin në Shqipëri. Shërbimi Inteligjent i Gjermanisë kishte nisur punën operative që prej muajit Maj-Qershor, për të evidentuar të gjithë hierarkinë policore që ishte implikuar dhe mbronte mbjelljet me kanabis. Hashtag.al shkruan se në lojë ishte dhe shërbimi inteligjent italian. Madje roli i këtij të fundit ka qenë i sikletshëm, sepse italianët ishin të përçarë.

Guardia di Finanza mbështet qeverinë Rama dhe ishte e interesuar në bojkotimin e hetimeve, ndërsa shërbimi inteligjent italian funksiononte në tjetër korridor dhe nxiste hetimet.

Roli dhe informacionet e BND-së gjermane ishin vendimtare në zbërthimin e skemës dhe zbulimin e individëve dhe rrethanave gjeografike që dokumentonin biznesin në fjalë.

Sipas Hashtag.al Edi Rama dhe Saimir Tahiri e kanë ditur shumë mirë se kush po luante dhe se cilën palë kishin kundër.

Ishte BND-ja gjermane dhe SHISH-i ato që po dokumentonin biznesin fitimprurës të kanabisit dhe implikimin e zyrtarëve të rëndësishëm policorë të rilindjes.

Dhe që prej Qershorit 2016, kur nisi puna operative e shërbimeve në terren, kryeministri Rama karikoi gjithë bateritë mediatike rilindëse që të shmangnin me çdo kusht vëmendjen nga çështja e kanabisit.

Edi Rama kishte siguruar heshtjen e ambasadorit amerikan Lu për kanabisin, por dhe heshtjen e ambasadores së BE-së Vlahutin, kishte siguruar partneritetin e Guardia di Finanza-s, por dështoi të ndikonte mbi shërbimin inteligjent Italian.

Është kanabisi dhe shndërrimi i qeverisë shqiptare në një kupolë karteli arsyeja bazike e shqetësimit të gjermanëve, çka shpjegohet dhe me angazhimin direkt të BND-së.

Sipas informacioneve, kryeministri Edi Rama ka qenë në dijeni se informacionet konfidenciale për kanabisin dhe lidhjet me të janë dërguar në të gjitha rangjet përkatëse politike në Gjermani, deri tek kancelarja Merkel.

Po sipas Hashtag.al, BND-ja ka bashkëpunuar ngushtësisht edhe me Shërbimin Informativ Shqiptar dhe me sa duket informacionet kanë shkuar shpejt drejt Gjermanisë, para takimit me Merkelin, që Rama e priste me kaq shumë entuziazëm.