Policia e Tiranës ka nisur një procedim penal për një avokat, i cili dyshohet se ka kërcënuar dhe goditur me grusht një klient, pasi ka pasur një debat në lidhje me një pagesë që do të bëhej pas marrjes së një shpërblimi.
Burimet zyrtare nga Policia thonë se incidenti ka ndodhur ditën e enjtje, në zyrën e avokatit Artan K., 53 vjeç që banon në rrugën “ Sami Frashëri”, shumë afër Drejtorisë së Policisë së Tiranës.
I plagosuri është shtetasi Anastas C, i cili menjëherë i është drejtuar policisë, për të denoncuar ngjarjen. Komisariati i policisë ka nisur menjëherë hetimet për ngjarjen e ndodhur dhe ka shoqëruar palët për t’i marrë në pyetje.
Sipas Policisë, ngjarja dyshohet se ka ndodhur për shkak të një zvarritjeje së një procesi në Gjykatën Adminastrative, ku i dëmtuari Anastas C. ka paditur Bashkinë e Himarës, ndërsa si palë e tretë është e përfshirë Avokatura e Shtetit, me përfaqësues avokatin Artan K.
Objekti i kësaj padie ka qenë detyrimi i organit administrativ për ndalimin e kryerjes së veprimeve, që cënojnë interesa të ligjshme të shtetasve dhe shpërblimin e dëmit.
Palët nuk kanë rënë dakord për përqindjen që do të merrte pala mbrojtëse në përfundimin e procesit gjyqësor dhe nga kjo ka lindur një mosmarveshje midis klientit dhe avokatit.
61 -vjeçari pretendon se është kërcënuar dhe goditur me grusht nga avokati, i cili është marrë nën hetim me akuzat “kanosje” dhe “dëmtime të tjera me dashje”. Por kjo gjë është mohuar nga avokati i cili është shprehur se as nuk e ka goditur dhe as kërcënuar klientit e tij. (K.P/Shuplaka)
Discussion about this post