Ka degjeneruar në ofendime personale mbledhja e radhës e Komisionit Hetimor Parlamentar për pajisjen e përgjimit “IMSI Catcher”.
Protagonistë kanë qenë deputeti i PD-së Asllan Dogjani dhe ai i PS-së Pjerin Ndreu, që të dy ish-funksionarë të lartë të Policisë së Shtetit.
“Unë kam qenë polic, por nuk kam qenë asnjëherë në burg dhe nuk jam hetuar për asnjë lloj krimi”. Kjo ishte deklarata e Dogjanit e cila e detyroi Ndreun të braktiste mbledhjen.
Sot në komision raportuan drejtori i hetimit të krimit të organizuar në polici, Ardian Çipa, Shefi i Forcave Operacionale Artion Duga dhe shefi i sektorit të Teknologjisë dhe Trajnimeve në Forcat e Posaçme Opracionale Eduart Goga.
Edhe sot, deputetët e opozitës ripërsëritën akuzën se pajisja në fjalë ka përgjuar kreun e Kuvendit dhe të LSI-së Ilir Meta si dhe ish-kryeministrin Sali Berisha.
