Për sherrin që ndodhi mes deputetit të Vetëvendosjes Frashër Krasniqit dhe deputetit të ”Nismës” Milaim Zekës në studion televizive ka reaguar së fundmi edhe gazetarja Arbana Xharra.
Ajo thekson se nuk pajtohet kurrsesi me gjuhën që përdori Milaim Zeka. Por ajo nëvizon se Vetëvendosja vepron ngjashëm si regjimi i Enver Hoxhës.
“A pajtohem me gjuhën e Milaim Zekes, kurrsesi! Në anën tjetër, partia Vetëvendosje me ushtrinë e saj të Facebookut të kryqëzon sa herë nuk pajtohesh me ta, madje te etiketon pamëshirshëm, dhe jo vetëm personalisht, por edhe familjarisht.
Ngjashëm vepronte edhe regjimi i Enver Hoxhës: pasi arrestonte një kritik, pastaj ia internonte familjen. Kush nuk e përfaqëson njëmendësinë e kësaj partie, gjendet në shënjestër të militantëve të saj, njerëz pa etikë dhe pa nder publik. Më pas fillon fushata sistematike e dehumanizimi ndaj individit që e konsiderojnë kundërshtarë politik. Si rezultat legjitimohet dhuna!”, shprehet Xharra.
Deputeti Krasniqi ndodhet në paraburgim. Deputetit të Lëvizjes Vetëvendosje, Frashër Krasniqit, i është caktuar masa e paraburgimit pas asaj që ndodhi mbrëmë mes tij dhe deputetit të Nismës, Milaim Zeka.
Zëdhënësja e policisë për rajonin e Prishtinës, Flora Ahmeti ka thënë’: “Me urdhër të prokurorit Krasniqi është në paraburgim”. (J.V/Shuplaka)
