Pas sherrit të ndodhur para dy ditësh në portin e Durrësit, ku punonjësit e sigurisë të kompanisë GNV ushtruan dhunë ndaj pasagjerëve, ka reaguar edhe policia.
Policia i rikthehet edhe ngjarjes duke theksuar se pasagjerët kishin disa orë që prisnin për të nisur udhëtimin dhe më pas situata u agravua.
Policia thekson se ka nisur proçedimi penal për rojen e linjës Bari-Durrës-Bari që goditi me sende të forta pasagjerët. Ndërkaq thekson se ka kërkuar nga Autoritetit Portual Durrës mbledhjen e Komitetit të Sigurisë me të gjithë Operatorët për marrjen e masave të nevojshme
Njoftimi i policisë
Në lidhje me një incident që ka ndodhur më datë 11.08.2018 në sheshin e trageteve në Port – Durrës, informojmë se:
Konflikti ka nisur midis ekuipazhit të tragetit të linjës Bari -Durrës-Bari dhe pasagjerëve. Pasagjerët ishin acaruar pasi kishin disa orë që prisnin për ti nisur për udhëtim, por trageti kishte pësuar defekt dhe kishte njoftuar se do të kishte vonesë në nisje.
Në lidhje me ngjarjen ka filluar procedimi penal në gjendje të lirë, për veprën penale “Plagosja e lehtë me dashje ” , në ngarkim të shtetasit I. M. 35 vjeç, banues në Itali, me detyrë roje fizike të linjës Bari – Durrës – Bari, pasi ky shtetas është konfliktuar dhe ka goditur me sende të forta disa shtetas që do të udhëtonin me traget për në Itali. Konflikti u shua me ndërhyrjen e punonjësve të Policisë së Kufirit Durrës. Drejtoria Rajonale për Kufirin dhe Migracionin Durrës për rastin në fjalë, me qëllim analizimin dhe parandalimin e rasteve të tjera i ka kërkuar zyrtarisht Autoritetit Portual Durrës mbledhjen e Komitetit të Sigurisë me të gjithë Operatorët në marrjen e masave të nevojshme.
(J.D/Faxweb.al)
Discussion about this post