Sot shënohet dita e rinisë dhe me vendim të Kuvendi i Shqipërisë është zyrtarisht ditë pushimi. Është një ditë e shënuar përsa i përket zhvillimeve demokratike në vendin tonë pasi për herë të parë me nismën e studentëve u zhvilluan protestat studentore.
Gjysëm shekull izolim nën regjimin diktatorial, kishin eklipsuar shpresat dhe dëshirat e të rinjve. Gjithçka do të niste nga ‘’Qyteti studenti’’, streha e të rinjve dhe vatra e lëvizjes për demokraci. Nga sheshi që sot ka marrë emrin e demokracisë studentët e atyre viteve i dhanë historisë së vendit një tjetër drejtim.
Akti i tyre publik, sa qytetar aq edhe politik, i dha fund në mënyrë paqësore epokës të gjatë të vetëizolimit, duke i hapur kështu rrugën e ekonomisë së tregut dhe shoqërisë së hapur.
Me shprehjen “E duam Shqipërinë si gjithë Europa”, ata kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë e demokratike. Sot pasi kanë kaluar 26 vite nga vendosja e pluralizmit vendi ka aoma shumë për të bërë në vendosjen e një regjimi demokratik të qëndrueshëm. Mbase për këtë do të duhet një tjetër forcë rinore e cila do të bëjë të mundur përparimin e vendit me hapa të shpejtë.
