Për qytetarët që u bie rruga të kalojnë në qendër të Tiranës është kthyer në shqetësues bllokimi për shkak të punimeve në sheshin ”Skënderbej”.
Por kryebashkiaku Erion Veliaj ka treguar sot se kur planifikohet përfundimi i tij, që do të jetë muaji qershor 2017, ndërsa parkimi nëntokësor planifikohet në muajin mars, po të vitit që do të vijë. ”Ambicia jonë është ta përfundojmë në qershor, kurse parkimi i sheshit ”Skënderbej” në mars.”, tha sot Veliaj.
”Ne kemi përfunduar disa punime kyç në qytet, unaza, parkimi nëntokësor në sheshin ”Skënderbej”. Na ka ngelur edhe 10% nga Bulevardi i Ri. Unë besoj do jetë Tirana e 10 viteve të ardhshme. Parafytyroj një Tiranë që avancon. Është një gjë e re që ne, përtej histerisë e hoqi apo jo polici, unë them që të gjithë ata që na dëgjojnë dhe kanë patur durimin të na lejojnë të punojmë. Do të shikojmë se si do të rritet vlera e pronës, sot te Pazari i Ri është rritur me 40% vetëm nga fluksi i bizneseve.
20 shkolla të reja do ngrihen në Tiranë, do ftojmë kompanitë vendase që të konkurojnë për lotet sipas konceptit ”ndërto, menaxho, transfero” me një normë interesi.”, tha më tej Veliaj, duke shtuar se do shkojnë në mbledhjen e Këshillit Bashkiak pa rritje taksash e tarifash vendore për këtë vit.
Kryebashkiaku premtoi edhe shkurtim të procedurave burokratike që vonojnë përgjigjet për shqetësimet dhe kërkesat e qytetarëve.
“Nga 1 Janari, qytetarët jo vetëm që do të dorëzojnë më pak dokumente por do të marrin përgjigje 2-3 herë më shpejt. Janë 30 mijë kërkesa çdo vit, për shembull procedura e likujdimit që zgjaste pafund. Tashmë të gjithë bizneset mund të aplikojnë për t’u pajisur me vërtetim likujdimesh, veç me kërkesën dhe kartën e identitetit; procedura për kërkesë apo ankesë online do të trajtohet për 15 ditë nga 1 Janari, veç kërkesës, të interesuarit do të plotësojnë një formular vetëdeklarimi, do të paraqesin ID (kartën e identitetit) dhe akt përfaqësimi (nëse është i huaj); nga 1 Janari do të punojmë për lehtësimin e procedurës së verifikimit në terren. Për procedurën juridike që marrim rreth 400 kërkesa në vit do të ketë shkurtim të afatit nga 30 ditë në 10 ditë maksimumi. Do të ketë lehtësim në procedurën për rimbursim apo për procedurën për regjistrimin e biznesit të ri, për të cilin marrim rreth 260 aplikime mujore. Afati për këtë procedurë do të shkurtohet nga 30 ditë në 15 ditë dhe do të kërkohet vetëm ID dhe formulari i vetëdeklarimit. Të gjitha bizneset do kenë mundësinë të konsolidohen e më pas të paguajnë taksat sepse Tirana do të jetë një qytet i hapur bizneset.”, ka vijuar më tej Veliaj.
