Disa zona të Beratit janë në rrezik përmbytjeje për shkak të shfrytëzimit jashtë kritereve të lumit Osum dhe të rezervuarëve të këtij qarku.
Prefekti i qarkut të Beratit, Fadil Nasufi, i cili dha edhe alarmin, kërkon ndërhyrjen e institucioneve përgjegjëse për të marrë masat e nevojshme.
Janë disa subjekte që ushtrojnë aktivitetin e rritjes së peshkut në 6 rezervuare, të cilët mbajnë nivelin e ujit në kuota të larta dhe në rast reshjesh rrezikojnë përmbytjen përreth.
Edhe shfrytëzimi i jashtëligjshëm i shtratit të lumit Osum nga firmat që punojnë për nxjerrjen e inerteve, mbetet problem për këtë zonë pasi ka sjellë devijim të shtratit në shumë pika.
Nasufi ka bërë publik edhe bilancin, sipas të cilit në rrezik për përmbytje janë dhjetëra hektarë tokë bujqësore dhe sera, si dhe dhjetëra banesa në disa fshatra të qarkut Berat.
Rrezikohen nga përmbytjet:
-bizneset në dalje të qytetit Berat
-70 banesa në Urë- Vajgurore
-100 ha sera në fshatin Goriçan
-80 banesa, 16 ha sera dhe 29 ha tokë bujqësore në fshatin Samaticë
-140 banesa dhe 17 ha tokë bujqësore e pemëtari në fshatin Drenovicë
-90 banesa dhe 25 ha tokë bujqësore e pemëtari në fshatin Rërëz
Një pjesë e këtyre zonave janë prekur edhe më parë nga përmbytjet brenda pak orëve reshje shiu.
