Një 26-vjeçar nga Gjirokastra ka rënë në prangat e policisë, pasi u kap duke transportuar mallra kontrabandë që i shiste online. Në kuadër të operacionit policor të koduar “Marketing”, në bashkëpunim me Prokurorinë e Gjirokastrës, është arrestuar shtetasi A. A., ndërsa është proceduar penalisht edhe babai i tij, F. A., 51 vjeç, për bashkëpunim në këtë veprimtari të paligjshme.
I riu u ndalua në aksin rrugor “Gjirokastër-Tepelenë”, ku u kap me 30 parfume pa dokumentacion ligjor, ndërsa gjatë kontrollit në banesë u sekuestruan mallra të tjera kontrabandë si veshje, aksesorë, pajisje celularësh, parfume dhe kamera sigurie.
Hetimet 7-mujore të policisë kanë zbuluar se 26-vjeçari i shiste produktet e paligjshme përmes rrjeteve sociale, duke shmangur detyrimet doganore dhe fiskale.
Materialet procedurale i janë referuar Prokurorisë së Gjirokastrës për veprime të mëtejshme.
