Është shkarkuar nga ana e Kolegjit të Posatshëm të Apelimit kreu i Gjykatës Kushtetuese të vendit Bashkim Dedja.
Ishte Komisioneri Publik ai që ankimoi vendimin e Komisionit të Pavarur të Kualifikimit për kreun e Gjykatës Kushtetuese, Bashkim Dedja, pasi mori në konsideratë rekomandimin e Operacionit Ndërkombëtar të Monitorimit. Sipas ONM, Dedja nuk arrin një nivel të besueshëm në vlerësimin e pasurisë.
Trupa në KPA përbëhej nga Ardian Hajdari, Luan Daçi, Albana Shtylla, Natasha Mulaj dhe Rezarta Schuetz. Anëtarët arritën në përfundimin se Bashkim Dedja nuk justifikon pasurinë dhe nuk ka nivelin e besueshëm për të vijuar detyrën.
Më herët Vetingu ka rrëzuar një pjesë të mirë të anëtarëve të Gjykatës Kushtetuese, duke e nxjerrë jashtë funksionit këtë institucion.
Fatos Lulo ishte anëtari i parë i Gjykatës Kushtetuese dhe gjyqtari i parë që iu nënshtrua procesit të vetingut. Më 23 mars, Komisioni i Pavarur i Kualifikimit e shpalli atë të papërshtatshëm, me argumentin se dispononte pasuri të shumta me burime të pajustifikuara. Lulo zgjodhi të mos paraqitej vetë në komision por dërgoi një avokat. Ai e apeloi vendimin e komisionit ndërsa Kolegji i Posaçëm i Apelimit e rrëzoi kërkesën e tij më 17 qershor.
Më 23 prill, Altina Xhoxhaj u ngel në veting për mospërputhje deklarimesh, mosjustifikim pasurie dhe mungesë të ardhurash. Xhoxhaj është në pritje të apelit në Kolegj.
Më 10 maj vetingu rrëzoi Fatmir Hoxhën, duke e lënë Gjykatën Kushtetuese me tre anëtarë ndërsa në korrik, Gani Dizdari, i fundit që iu nënshtrua vetingut, u shpall gjithashtu i papërshtatshëm.
Ndërkohë që e vetmja që ka kaluar vetingun është gjyqtarja Vitore Tusha, e propozuara e presidentit Meta për kreun e KLSH-së.
(E.K/FAXWEB.AL)
