Shkarkohet nga detyra polici R.Çollaku që mori rryshfet nga një gazetar, i cili filmoi momentin e mitmarrjes, publikuar nga ”Shuplaka”. Burime të Policisë së Shtetit thonë se pezullimi nga detyra i policëve rrugorë, polici që mori rryshfet dhe kolegu i tij, në shërbim në zonën e Golemit ka qenë i menjëhershëm, ndërsa strukturat e brendshme po hetojnë ngjarjen deri në arrestimin e tyre.
Gazetari ka regjistruar fshehurazi, duke nxjerrë skemën e korrupsionit të policit dhe si ai manipulonte me gjobat duke marrë rryshfet. Për 5 mijë lekë të vjetra, polici i rrugores, ka shmangur një penalitet të madh për gazetarin që po drejtonte mjetin, pasi ai kishte harruar në banesë patentën. Gjoba 10 mijë lekëshe i është prerë për mosndezje të fenerave dhe jo mungesë patente, ndërkohë që Çollaku ka marrë 5 mijë lekëshin për këtë ”nder”. (V.G/SHUPLAKA)
BISEDA E PLOTË E REGJISTRUAR PA DIJENINË E POLICIT:
Gazetari: Do më vesh gjobë apo do pish një kafe të jap një 5 mijë lekësh, unë të thashë thjesht pa dashje?
Polici: Po ta vë një gjobë të vogël, një 10 mijë lekësh, s’kam si e rregulloj ndryshe, po ta vëj kështu…për dritat.
Gazetari: Po unë të thashë thjesht pa dashje.
Polici: Jo jo të kam vënë një gjobë të vogël se do e hash më keq ashtu për patentën shkon 800 mijë lekë.
Gazetari: S’ke si e rregullon ndryshe thashë t’i binim më për shkurt, thashë se e kishe më të mundshme ashtu.
Polici: Po jo të thashë e kam të pamundur, kam dhe unë kontroll se vjen ndonjë sheh letrat thotë pse e ke mbajtur këtu. Nuk i njohim të gjithë njerëzit a kupton.
Gazetari: Thashë se e kishe më të mundshme ashtu.
Polici: Nuk i njofim njerëzit mo burrë.
Gazetari: Po unë këtu jetoj mo burrë te kompleksi në Golem, pavarësisht se nuk rrij shumë aty.
Polici: E kupto sesa të besova unë ty ë?
Gazetari: Ë se s’ka problem.
Polici: Se po të besoja të kisha pritur sa të vije me patentën.
Gazetari: Merreni dhe një kafe meqë e nisa.
Polici: Rrofsh faleminderit, unë e bëra punën time.
Discussion about this post