Është shkarkuar kreu i Policisë së Burgjeve, Petrit Koshaj. Ky largimi i zyrtarit të lartë të burgjeve vjen pas arrestimit të ish-drejtorit Artur Zoto.
Burime të afërta shprehen për “Shuplaka” se shkarkimi i tij “ka ardhur për shkak të shkeljeve të rënda procedurale”. Mesa duket Koshaj është përpjekur t’i devijonte shkarkimit duke kërkuar leje vjetore, por duket se “sharra i ngeli në gozhdë”, për shkak se shkresat për shkarkimin e tij kishin mbërritur në tryezën e ministrit Vasili.
“Disa ditë më parë ka përgatitur largimin e tij, pasi ka bërë edhe zbrazjen e zyrës duke kërkuar me justifikimin e lejes vjetore. Por ndërkohë letrat për shkarkimin e tij ndodheshin në zyrën e ministrit.”, bëjnë me dije këto burime.
Shkarkimi i tij u firmos një ditë më parë nga ministri i Drejtësisë, Petrit Vasili. Ky vendim u mor pas disa kontrolleve të ushtruara ku u konstatuan shkelje nga ana e Koshaj.
Petrit Koshaj u prezantua në krye të kësaj detyre më 17 dhjetor 2015 nga ministri i asaj kohe i Drejtësisë, Ylli Manjani dhe Artur Zoto.
Në emërimin e tij, Koshaj u shpreh se ishte koshient për vështirësitë e misionit, por me mbështetjen e kolegëve, do arrihet realizimi i të gjitha objektivave: “Jam koshient për vështirësitë e këtij misioni. Edhe unë besoj se me punë, me mbështetjen e gjithë kolegëve, do të realizojmë të gjitha objektivat që na janë caktuar.”
(XH.A/SHUPLAKA)
(Në rreth, Petrit Koshaj)
