Departamenti i narkotikëve në Artë të Greqisë, pas disa muajsh hetime ka arritur të çmontojë një rrjet të trafikut të drogës që funksiononte Artë, Janinë, Etoloakarnania dhe Prevezë.
Operacioni policor i zhvilluar dje ka çuar në pranga 18 persona nga mosha 23 deri në 78 vjeç, midis të cilëve edhe dy shtetas shqiptarë dhe një grua.
Midis të arrestuarve, pesë ishin udhëheqës të grupit, ndërsa pjesë e drejtimit ishin edhe dy shqiptarët 36 dhe 33 vjeç, si dhe tre shtetas grekë.
Organizata ka funksionuar që nga muaji shtator i vitit të shkuar.
Gjatë aksionit është sekuestruar 239.23 gram heroinë, 18 kg kanabis, shtatë makina, shtatë peshore, materiale të posaçme për paketimin, ruajtjen dhe presimin e drogës, një shumë prej 10 mijë e 955 euro, 38 telefona celularë, si dhe një armë gjahu. Shumë prej të arrestuarve kanë pasur probleme të mëparshme me drejtësinë.
Drejtoria e Përgjithshme e Policisë greke tha se vetëm gjatë Janarit u bllokuan në territorin grek rreth 1,3 tonë marijuanë dhe disa dhjetëra kilogramë lloje të forta të drogës (heroinë dhe kokainë).
( M.D/ Shuplaka)
Discussion about this post