Prokuroria e Krimeve të Rënda në bashkëpunim me autoritetet franceze kanë shkatërruar një grup grabitësish shqiptarë që operonin kryesisht në Francën Lindore, Belgjikë, Itali, Spanjë dhe Gjermani.
Arrestimi i 7 shtetasve shqiptarë është bërë në prill të 2019-tës, ndërsa lajmi është njoftuar në një konferencë të përbashkët shtypi nga kryeprokurori i rajonit, Fransua Perain (François Pérain) dhe prokurori shqiptar, Besim Hajdarmataj të hënën (13 maj) në Nancy (Meurthe-et-Moselle).
Të arrestuarit mësohet se grabisnin kryesisht banesa dhe vlera e mallrave të vjedhura është 300.000 euro.
Katër persona nga e njëjta familje, Kajtazi, u arrestuan në Uckange dhe Hayange, në prill të dyshuar si bashkëpunëtore në vjedhje. Familja Kajtazi ishte prej dy vitesh rezidente në Francë dhe dyshohet se u gjente tre të rinjve shqiptarë banesa që ti vidhnin.
Ndërsa në Shqipëri, me urdhër të prokurorit Besim Hajdarmataj u ndaluan Besnik Fufi, Alfons Perloka dhe Aleks Marku, me banim në Laç. Për këta persona, gjykata për Krime të Rënda ka caktuar masën e sigurimit “arrest në burg”.
“Kjo është hera e parë që arrestimet e grabitësve shqiptarë kryhen në vendin e tyre të origjinës pas akteve të kryera në Francë,” tha prokurori François Pérain.
Ndërsa prokurori Hajdarmataj e vlerësoi këtë operacion si “një sinjal të qartë për grupet kriminale shqiptare që e konsiderojnë Shqipërinë si një vend ku mund të fshehin gjurmët e krimeve të kryera në Francë”.
Ata akuzohen për vjedhjen me forcë të rreth 70 apartamenteve, në tre-mujorin e fundit të vitit 2018 dhe vlera e mallrave të vjedhura, përfshirë bizhuteri, telefona dhe para kesh arrin 300.000 euro.
(E.K/FAXWEB.AL)
Discussion about this post