Edhe pse dukej se do të ishte një vizitë miqësore, e para për Albin Kurtin në cilësinë e kreut të qeverisë së Kosovës, jashtë vendit, tensionet nisën shumë shpejt, pikërisht kur u pyetën nga gazetarët për idenë e Minishengenit Ballkanik.
I pari që kërkoi të përgjej ndaj kësaj pyetjeje ishte Albin Kurti, i cili tha se për këtë temë kishte folur shumë pak me Ramën, duke qenë se prioritet i tij si kryeministër ishte makroshengeni shqiptar.
“Kjo ishte një temë që u diskutua pak në takimin tonë, pasi sot më shumë folëm për makroshengenin shqiptar, sesa mbi mini-shengenin ballkanik”, tha Kurti, ku nuk vonoi as përgjigja e Ramës, ku në ajër u dallua dhe tensioni, mes të dyve.
Si një prej nismëtarëve të Minishengenit së bashku me Vuçiçin, Rama tha se nuk mund të ketë makroshengen të shqiptarëve pa atë Ballkanik, duke kushtëzuar në këtë mënyrë, marrëdhëniet mes dy shteteve të të njëjtit komb.
“S’ka mini shengen shqiptar, nëse nuk ka mini shengen ballkanik. Është e vërtetë që kemi nevojë për një shpejtësi të re, Albini është i ri në detyrë. Besojme se Komisioni ndërshtetëror do ti japi mundësi të dy qeverive për të parë marreveshjet ekzituese”, tha më tej Rama në fjalën e tij.
Ideja e Minishengenit u kundërshtua ashpër nga qeveria e kaluar në Kosovë, ku Haradinaj dhe Thaçi nuk pranuan që të ishin në asnjë prej takimeve të zhvilluara në nivel drejtuesish vendesh, sa kohë që nuk ka njohje reciproke mes vendeve.
Minishengeni ka sjellë reagime të vazhdueshme edhe nga opozita në Shqipëri, e cila e konsideron këtë përpjekje të Ramës , si një ndihmë në krijimin e Serbisë së Madhe, sa kohë që dhe vetë Vuçiç, do të deklaronte në një intervistë, se ai ishte autorizuar që të fliste në emër të Maqedonisë, Shqipërisë dhe Kosovës, edhe me liderë të tjerë europianë.
Për tu rikthyer te vizita e Kurtit në Tiranë, të dy kryeqeveritarët ranë dakord që mbledhja e radhës mes kabineteve të të dy vendeve të mbahet në Shkodër, edhe pse duhet thënë se deri tani nuk ka një bilanc të marrëveshjeve që janë nënshkruar me qeverinë e mëparshme të Ramush Haradinajt.
(E.K/Faxweb.al)
Discussion about this post