Në kuadër të kontrolleve të vazhdueshme për kapjen e shtetasve të shpallur në kërkim, Policia e Shkodrës ka finalizuar me sukses një tjetër operacion, duke bërë të mundur ndalimin e një 31-vjeçari të dyshuar për disa vepra penale.
Specialistët për Hetimin e Krimeve në Komisariatin e Policisë Shkodër, në bashkëpunim me shërbimet e Forcës së Posaçme “Shqiponja” dhe Sektorin për Hetimin e Krimeve të Rënda, bazuar në informacionet nga inteligjenca policore, kanë lokalizuar dhe ndaluar shtetasin:
Arlind Kajoshi, 31 vjeç, banues në Shkodër, i shpallur në kërkim për veprat penale:
- “Plagosja e lehtë me dashje”, kryer në bashkëpunim;
- “Kanosja”, kryer në bashkëpunim;
- “Mbajtja pa leje e armëve, armëve shpërthyese dhe e municionit”.
Nga hetimet e deritanishme, rezulton se A. K. dyshohet se është përfshirë në një konflikt të ndodhur më 03.06.2024, në rrugën “Pogej”, lidhur me një mosmarrëveshje për vendparkimin e automjeteve. Gjatë këtij konflikti është goditur fizikisht dhe me sende të forta shtetasi V. B.
Policia vijon punën për kapjen e bashkëpunëtorit tjetër të dyshuar në këtë ngjarje, S. H., 27 vjeç, i cili është shpallur në kërkim.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme hetimore dhe ligjore.
