Një konflikt mes fqinjëve në fshatin Dobraç mund të kishte përfunduar në tragjedi, por ndërhyrja në kohë e Policisë parandaloi një ngjarje të rëndë.
Specialistët për Hetimin e Krimeve të Komisariatit të Policisë Shkodër, në bashkëpunim me Patrullën e Përgjithshme dhe Forcat e Posaçme “Shqiponja”, arrestuan në flagrancë një 41-vjeçar, pasi qëlloi me armë zjarri për të kanosur fqinjin e tij.
I arrestuari është shtetasi Sirjan Jahja, banues në Dobraç, i cili dyshohet se ka qëlluar në tokë me një armë zjarri të llojit pistoletë, për motive të dobëta, me qëllim frikësimin e fqinjit të tij, shtetasit A. K.
Arma e përdorur u sekuestrua në cilësinë e provës materiale, ndërsa ndaj Sirjan Jahja janë kryer veprimet procedurale përkatëse.
Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme ligjore.
