Autorët e grabitjes së argjendarisë në Shkodër janë identifikuar nga policia dhe janë kapur. Kështu policia e Shkodrës ka bërë të mundur arrestimin dhe ndalimin e shtetasit Françesko Vukaj, 23 vjeç, banues në fshatin Rrenc, Shkodër.
Gjithashtu si bashkëpuntor i tij u arrestua shtetasi: Iraldo Filipi, 28 vjeç, banues në fshatin Gajtan, Shkodër.
Ndalimi i shtetasit Francesko Vukaj, u bë pasi dyshohet si autor i grabitjes me datë 03.02.2018, ku me mjetin tip Volksëagen pa targa, ka goditur qepenin e një argjendarie në lagjen “Vasil Shanto”, ka marrë disa sende floriri brenda, dhe më pas është larguar duke braktisur mjetin.
Ndërsa shtetasi Iraldo Filipi u arrestua, pasi në anën tjetër të rrugës ka qenë duke pritur me mjetin tip Benz, për t’u larguar sëbashku me shtetasin Françesko Vukaj nga vendngjarja, pas grabitjes së argjendarisë.
U sekuestruan në cilësinë e provës materiale mjeti tip Benz me targa AA 294 GU, i cili është përdorur nga autorët për largimin nga vendngjarja, si dhe një orë dore floriri e cila rezulton e vjedhur në argjendari.
Materialet iu referuan në Prokurorinë e Rrethit Gjyqësor Shkodër për veprën penale të “Vjedhjes, e kryer në bashkëpunim” e “Shkatërrimi i pronës” parashikuar nga neni 134/2, 25 e 150 i Kodit Penal.
(M.Q/Faxweb)
Discussion about this post