Kryetari i Bashkisë së Tiranës, Erion Veliaj, inspektoi së fundmi punimet për ndërtimin e shkollës 9-vjeçare në fshatin Mihajas të Bërzhitës. Ai u shpreh se bashkia mbajti fjalën e dhënë për banorët e kësaj zone që do të trajtohen njësoj si ata të qendrës së Tiranës.
Kryebashkiaku bëri të ditur se për shkak të hapësirës së madhe të shkollës, ajo do të shërbejë edhe si qendër shëndetësore:
“Jam këtu për të mbajtur fjalën dhe për të thënë se pavarësisht vështirësive financiare në Bashki, kur jep fjalën duhet ta mbash. Shkolla është pak më e madhe se sa nevojat dhe brenda saj kemi vendosur edhe qendrën shëndetësore. Pas orëve të mësimit, ajo mund të përdoret edhe për aktivitete të tjera të komunitetit.”
Më tej, Veliaj u shpreh se Bashkia e Tiranës do të vijojë edhe me rrugën, ndërsa theksoi nevojën për të ndërmarë disa nisma që do ta lidhnin më shumë këtë zonë me tregun e Tiranës.
(XH.A/SHUPLAKA)
Discussion about this post