Gazetari, Elvis Myrtaj ka folur në studion e “Fax News” lidhur me arrestimet e bëra nga policia e Durrësit ditën e sotme pasi u bë e mundur zbardhja e disa ngjarjeve kriminale të ndodhura.
Myrtaj tha se zbardhja e ngjarjeve kriminale, që shkaktoi edhe arrestimin e 14 personave, erdhi pasi dy vëllezërit, Indrit dhe Gentjan Beqiraj, janë kapur nga shoferi i “Rrumi i Shijakut” teksa po vëzhgonin këtë të fundit për ta eleminuar.
Ai zbuloi se kishte qenë shoferi i Aleksandër Muharremit ai i cili kishte dhunuar fizikisht njërin prej vëllezërve të cilin ishin detyruar ta linin në rrugë pasi nuk mund të kalonin në perimetrin e sigurisë.
“Mbrëmjen e së dielës këta persona kanë qenë duke vëzhguar Rrumin e Shijakut. Kanë pasur një konflikt fizik dhe më pas shoferi i Aleksandër Muharremit, i ka futur këta persona në automjetin e tij. Për 500 metra ai i ka dhunuar fizikisht. Aty pas dhunimit dhe kërcënimeve, dy vëllezërit kanë vendosur të shkonin dhe të bënin një kallëzim vetë në policinë e Durrësit, duke qenë se bëhej fjalë për një person të njohur të botës së krimit. Aty kanë vendosur të tregojnë personat të cilët kanë marrë porosi. Janë zbardhur të paktën tre ngjarje kriminale. Dy vëllezërit punonin si vrasës me pagesë dhe kanë deklaruar të gjithë aktivitetin e tyre kriminal. Mund ta themi se kanë marrë statusin e dëshmitarit të policisë duke qenë se kanë zbardhur një sërë ngjarjesh.
Pritet që të mërkurën ndaj këtyre shtetasve të caktohet edhe masa e sigurisë. Kjo dosje me shumë mundësi do t’i kalojë SPAK pasi kemi të bëjmë me një aktivitet të kundraligjshëm në kuadër të strukturuar kriminal. Me shumë gjasa pritet që të ketë zhvillime të tjera.
Dy prej personave të shpallur në kërkim, ndodhen jashtë territorit të Shqipërisë, ndërsa dy të tjerë nuk janë arrestuar dot.
Sa i përket këtij operacioni ka qenë vetëm Ilirjan Fici i arrestuar për një vrasje të ndodhur në Lezhë. Fici i akuzuar si porositës ka qenë i vetmi person i burgosur. Ndërsa të tjerët kanë qenë në liri”– u shpreh Myrtaj.
Discussion about this post