Paraditen e kësaj të premteje, në Kryesinë e Kuvendit të Shqipërisë është hedhur shorti i refuzuar nga presidenti Meta, për plotësimin e stafit të Këshillit të Emërimeve në Drejtësi.
Pas shortit rezultoi se, nga Gjykata Kushtetuese janë zgjedhur Vitore Tusha dhe Bashkim Dedja, ndërsa anëtar zëvendësues nuk ka; Ardian Dvorani nga Gjykata e Lartë, ndërsa anëtar zëvendësues Medi Bici; Arta Marku nga Prokuroria e Përgjithshme, pa anëtar zëvendësues; Fationa Memçaj nga prokuroritë e Apelit, pa anëtar zëvendësues; Fatri Islamaj dhe Margarita Buhali nga gjykatat e Apelit, ndërkohë që anëtar zëvendësues është Gurali Braimllari; si dhe Eriol Roshi nga gjykatat administrative, me anëtar zëvendësues Klodiana Veizi Memën.
Me ngritjen e Këshillit të Emërimeve në Drejtësi, hapi i radhës është plotësimi i vendeve vakante në Gjykatën Kushtetuese, duke i rikthyer asaj funksionimin.
Ky short u parapri nga debate të ashpra mes deputetit të PD-së Oerd Bylykbashi dhe kreut të Kuvendit Gramoz Ruçi.
Deputeti i PD-së Oerd Bylykbashi është shprehur në nisje të shortit: Hedhja e shortit sot është në kundërshtim me ligjin, këtë e thotë edhe Presidenti i cili thotë që është e pamundur të hedhë një short në kushtet kur dispozitat tranzitore kanë vdekur. Neni 284 ka kohë qe e ka ezauruar funksionin e tij dhe nuk shërben më si bazë ligjore. Kuvendi po vepron pa asnjë bazë ligjore dhe kushtetuese, në kundërshtim me ligjin ju bllokuat ngritjen e KED me pretendimin që fillimisht duhet të bëhej vettingu ndërsa në ligj thuhet se kandidatët e KED i nënshtrohen me përparësi Vettingut. Presidenti ua bën të qartë u thotë që se ushtroj dot këtë kompetencë se nuk kam bazë ligjore. Produkti i shortit është antikushtëtues. Ky është një proces që do të shkonte me kandidatura të lira, ju e keni zëvendesuar me katër persona, me kreun e gjykatës së lartë, me atë të gjykatës kushtetuese dhe me prokuroren e përgjithshme të përkohshme që pas disa ditësh i bëhet një vit në detyre kësaj krijese të çuditshme kushtetuese. Tërhiquni nga ky short sot dhe degjoni thirrjen e presidentit.
Ndërkohë që kreu i Kuvendit, Gramoz Ruçi është shprehur: Sot jemi mbledhur për të hedhur shortin. Jam konsultuar me kushtetutën dhe ligjin organik, letrën e presidentit dhe pasi bëra gjithë këtë proces. Sot këtu nuk është as koha as vendi ku mund të diskutohen keto. Këtu hidhet shorti.
(E.K/FAXWEB.AL)
