Shqiptari Ali Qazimaj është shpallur fajtor nga një gjykatë në Angli për vrasjen e Peter dhe Sylvia Stuart, që u zhdukën nga shtëpia e tyre në Weybread, Suffolk.
Trupi i zotit Stuart, 75 vjeç, u gjet në një lumë pranë banesës qershorin e kaluar, por zonja Stuart, 69 vjeçe, ende nuk është gjetur.
Për këtë krim, Qazimaj, 43 vjeç, është shpallur fajtor nga gjykata e Ipswich.
Në gjykatë, u tha se Qazimaj ka vrarë çiftin dhe më pas u largua nga Anglia. Ai u arrestua më pas në Luksemburg dhe u ekstradua në Angli.
Dënimi për të pritet të jepet më vonë gjatë kësaj të marte, raporton BBC.
Shqiptari është akuzuar për vrasjen e çiftit në muajin maj të vitit të kaluar. Ai kishte vrarë çiftin, pasi kishte mësuar se ata ishin milionerë, shkruan gazeta britanike Daily Mail.
“Në zemër të këtij rasti është një mosmarrëveshje në lidhje me identifikimin. Ne themi se Ali Qazimaj vrau këta dy persona. I pandehuri mohon se është Ali Qazimaj. Ai pretendon të jetë një njeri i quajtur Vital Dapi. Ne themi se është thjesht një gënjeshtër”, kishte thënë prokurori, Karim Khalili në seancën e kaluar të gjykatës, më 7 shkurt.
I pandehuri, i identifikuar si Ali Qazimi, dikur banor ilegal në qytetin Esexx të Anglisë, aktualisht nuk ka një banim të caktuar.
(M.D/ Shuplaka)
