Çdo prag fundviti ka kategori të caktuara që përfitojnë shpërblime nga qeveria. Këtë vit ende nuk ka një njoftim zyrtar për shpërblimet që do të jepen. Ashtu si nuk ka edhe një fond të akorduar për këtë gjë.
Ka patur disa praktika që janë ndjekur, njëra prej të cilave ka qenë ajo e dhënies së pagës së 13-të për punonjësit e administratës. Kjo praktikë është ndjekur deri në vitin 2013 dhe më pas është hequr për shkak të vështirësive që përballej arka e shtetit.
Por si është shprehur numri dy i Ministrisë së Financave Ervin Mete i pyetur me këtë fakt ?
‘’Ne besojmë që shpërblimin ua japim përmes rritjes së pagesave të administratës. Ndërsa për pensionistët do të vlerësohet, e rëndësishme për momentin është që të mos lëmë asnjë detyrim të prapambetur, çka do të thotë që të gjitha detyrimet nga kontratat të shlyhen deri në fund të vitit. Nëse shlyejmë këto dhe do të kemi sufiçit atëherë do të vlerësojmë edhe mundësinë e shpërblimit të pensionistëve. Edhe për ne do të ishte i dëshiruar’’, është shprehur zëvendësministri Mete duke lënë pa një konfirmim të sigurtë shpërndarjen e shpërblimeve.
