Drejtori i Institutit të Sigurimeve Shoqërore, Astrit Hado, ka bërë me dije se nga java tjetër do të nisë shpërndarja e shpërblimeve bashkangjitur pensioneve. 643 mijë pensionistët do të munden së shpejti të tërheqin shpërblimin prej 6 mijë lekësh që qeveria ka vënë në dispozicion të secilit prej tyre.
Kreu i ISSH-së, ka sqaruar për “Gazetën Panorama” se është arritur dakordësimi me Postën Shqiptare për skemën e ndarjes së parave. Mendohet që ndarja e shpërblimeve të nisë nga dita e mërkurë.
“Nga e mërkuara, pensionistët do të mund të marrin bashkë me pensionin e muajit edhe shpërblimin e përcaktuar nga qeveria prej 6.000 lekësh.”, ka theksuar Hado.
Më tej, ai ka sqaruar edhe si do të veprohet me ata pensionistë që kanë datat e pensionit përpara të mërkurës: “Në datën e parë të nisjes të shpërndarjes së shpërblimit do të punohet me dy turne. Gjatë turnit të parë do të ndahet pensioni dhe shpërblimi për pensionistët që kanë ditën e pensionit. Pasdite do të ndahet vetëm shpërblimi për ata që e kanë pasur ditën e pensionit në datat 1 dhe 2 dhjetor. Skema do të vazhdojë e tillë në ditët në vijim.”
Drejtori i ISSH-së gjithashtu ka sqaruar se shpërblimi nuk humbet në rast se gjatë periudhës së mbetur të vitit, nuk arrihet të tërhiqet nga pensionistët, pasi ata do të kenë mundësi ta tërheqin përgjatë 2017-ës.
Discussion about this post