Ditën e fundit të fushatës zgjedhore, policia ka kapur në flagrancë disa persona, duke shpërndarë para në Shkodër. Policia bën me dije se ngjarja është shënuar sot në Lagjen ‘Guerrile’ në Shkodër, ndërsa disa persona me një makinë të bardhë me logon e KESH, shpërndante vlera monetare.
Madje një nga personat me vete kishte dhe listën e personave përfitues të dëmshpërblimeve për zonat e përmbyrura, ku bënte pjesë edhe vetë.
Kujtojmë se një rast i ngjashëm u denoncua gjatë ditës së sotme edhe nga “Zalart”, që në një artikull shkruante se qytetarëve në Shkodër po iu blihen votat në këmbim të 50 eurove.
Megjithatë sipas “Zalart”, makina është në pronësi të PSD-së, kandidati i së cilës për Shkodrën është Tom Doshi. Por policia njofton se makina është e KESH, megjithatë ende nuk është e sigurt nëse bëhet fjalë për të njëjtin rast.
DETAJET E POLICISË
Sot, Policia mori një informacion se persona të paidentifikuar ishin duke shpërndarë vlera monetare në vëndin e quajtur Lagjia ‘Guerrile’ Shkodër.
Shërbimet e Komisariatit të Policisë Shkodër shkuan në vendin konkret ku u konstatua automjeti me targë AA 147 NC, tip ‘Ford’ me ngjyrë të bardhë me logo dhe në pronësi të KESH Tiranë. Ne mjet u gjeten shtetasi A. Gj., 48 vjeç, banues ne Tiranë, me detyrë ekonomist në Drejtorinë Ekonomike të KESH, së bashku me shtetasit A. P, G. L, P. Ll. dhe N. N., të cilët u shoqëruan në Drejtorinë Vendore të Policisë Shkodër.
Gjatës deklarimeve, shtetasi A. Gj, pohoi se prej rreth një muaji ishte autorizuar nga Korporata Energjitike Shqiptare për shpërndarjen e dëmshpërblimeve (në çeqe) në zonat e përmbytura për rrethin e Shkodrës sipas VKM-së nr 842 datë 16.12.2011 dhe urdhërit nr 150 datë 18.04.2017 të Ministrit të Energjitikës.
Ai me vete kishte dhe listën e personave përfitues të dëmshpërblimeve, në të cilën figuronin dhe shtetasit e lartpërmendur. Materialet do t’i referohen Prokurorisë Pranë Gjykatës së Shkallës së Parë Shkodër për vleresim të rastit. (D.D/Shuplaka)
