Skandali i ujërave të zeza në portin e Durrësit ka shkaktuar reagimin e një sërë strukturash. Drejtoria e Mjedisit e Durrësit nisi në vendngjarje një grup inspektimi. Sipas kreut të Mjedisit në një prononcim për “DurrësLajm”, Eneo Hasa, kjo është hera e parë që bëhen shkarkime të ujërave të zeza që nuk dihet si kanë përfunduar në det.
Sipas tij, ende nuk dihet nëse ato kanë përfunduar në det si pasojë e ndonjë manovre të gabuar nga Ndërmarrja e Ujësjellës-Kanalizimeve, apo nga ndonjë anije në kanalizimin e rrjetit të ujërave të bardha e përfunduan në det. Ai siguroi se situata do të hetohet.
Pas kësaj deklarata, Ndërmarrja e Ujësjellës-Kanalizimeve mohoi mundësinë e ndonjë manovre të gabuar nga ana e kësaj ndërmarrje.
“Ndonjë anije ose traget mund t’i ketë derdhur në rrjetin e ujërave të bardha e kanë përfunduar në akuarium. Problemi qëndron në faktin se tubacioni shkarkues nuk dihet se kur është ndërtuar dhe prej ku zë fill, por asnjë prej punonjësve të kanalizimeve nuk ka bërë asnjë manover për të shkarkuar ujërat e përdorur në rrjetin e kanalizimeve të portit.”, është shprehur inxhinieri Elton Doda.
Discussion about this post